Okada Ban – Man Turns Keke Napep to Mini Jeep Photos goes viral ! Another Makes Keke Jeep !
My country people, una good morning o. How una dey? How una dey hold body? Hope una don register for una PVC? If you Neva collect am abeg make una run go collect am o onto say your vote na your power o. Today na another ogbonge Thursday for naijapidgin and una know as we dey do am, na to bring una beta Tori wey dey happen for we country Nigeria.
Una know say na rainy season we dey and this rain nowadays no dey give person sign before e fall. Wether for change just now before you close eyes, everybody don dey run four forty dey find where dey go hide. If you sharp see Keke na to jump enter the Keke sharpaly before another person go take your position but the worst thing wey go happen to person na make you enter Keke wey no get cover. Your own done well that day.
Na because of this one beta nigerian come siddon say e fit make life easy for Nigerians. This person come make Keke wey be like Jeep with doors and windows and even electric fan wey go dey blow you inside and you dey enjoy cool music. No single rain go touch you until you reach where you dey go.
The Keke fine no be small and e fit carry 6 passengers comfortably nothing go happen. Call am our own made in naija mini Jeep nothing do you. Anyway, this na welcome development. We hope our government go fit support person wey do this thing so that soon e go full everywhere. Even God know say we need this kind innovation for we country.